Í komandi viku kemur nýggjur frystilínubátur til Klaksvíkar. Tað er reiðaríið Ågot, sum hevur keypt nýggjan línubát í Noregi, og báturin varð yvirtikin í Kristiansund í farnu viku.
Nýggi Ågot er bygdur í 1970 og hevur siglt undir navninum Urvaag. Báturin er stívliga 37 metrar langur, og varð høvuðsumvældur í 1995. Báturin fekk tá nýggj manningarrúm og er í sera góðum standi.
Gamli Ågot, sum er frá 1960, verður seldur reiðarínum hjá Urvaag.
Tað er skipsmeklaravirkið MARETEC á Argjum, sum hevur skipað fyri søluni av hesum báðum skipunum.
Ågot fær nú nakrar smærri ábøtur og verður málaður, men línubáturin skal eftir ætlan koma til Klaksvíkar fyrst í komandi viku.
