Íslendsku frásøgumennirnir nevna 5-4 sigurin hjá Breiðablik á Fram í Kópavogi í kvøld ein tann mest ótrúliga dystin nakrantíð í bestu íslendsku fótbóltsdeilini.
Breiðablik var á odda bæði 3-0 og 4-2, men stóð við einum 4-4 javnleiki og bert einum stigi, tá málkongurin úr Rituvík, Klæmint A. Olsen hegnisliga stútaði bóltin í netið hjá Fram til endaliga úrslitið 5-4, tá tíðin var farin útum teir 95 minuttirnar.
Klæmint kom á vøllin fyri Patrik Johannesen, ið legði Breiðablik á odda 2-0 í fyrra hálvleiki. Tá vóru 82 minuttir farnir av dystinum, og talan var um debut hjá Klæminti í Bestudeildini.
- Kenslan er ótrúliga góð í kvøld. At koma á vøllin fyri fyrstu ferð í Bestudeildini, og so at avgera dystin í síðstu løtu, tað kennist ótrúliga gott. Sigur Klæmint í stuttari viðmerking til in.fo.
Um sigursmálið sigur Klæmint: - Málið kom eftir hornaspark í høgru. Eg var púra ódekkaður í brotsteiginum, so tað var lagamanni at bara skalla bóltin í málið, greiður ein fegin Klæmint frá.
Patrik Johannesen fekk eisini sítt fyrsta mál fyri Breiðablik í Bestudeildini í kvøld: - Eg fái bóltin á miðjuni, reki frameftir, spæli út á kant og fái hann inn fyri og avslutti fyrstu ferð. Tíbetur fer bólturin í netið. Tað er sjálvandi deiligt at fáa hol á, men tað týdningarmesta er at fáa tey trý stigini, greiðir Patrik frá í stuttari viðmerking til in.fo.
Um hvussu hann upplivdi sigursmálið hjá Breiðablik sigur Patrik: - Klæmint stútar hann inn aftaná horna, og tað er soleiðis vit kenna hann best í Føroyum. Eg eri sera glaður hansara vegna, staðfestir ein fegin Patrik.
Breiðablik 5 - 4 Fram
1-0 Stefán Ingi Sigurðarson ('4)
2-0 Patrik Johannesen ('24)
3-0 Stefán Ingi Sigurðarson ('28)
3-1 Guðmundur Magnússon ('42)
3-2 Már Ægisson ('52)
4-2 Stefán Ingi Sigurðarson ('53)
4-3 Fred Saraiva ('61)
4-4 Magnús Þórðarson ('76)
5-4 Klæmint Andrasson Olsen ('95)
