- Vit eru øll trygg. Ráðini frá donsku sendistovuni er, at øll skulu halda seg heima. So hini starvsfólkini eru heima í dag, meðan eg eri einsamøll á sendistovuni í morgun. Annars eru boðini, at vit skulu halda okkum inni og fylgja boðunum frá donsku tilbúgvingini.
Tað sigur Kate Sanderson, sendikvinna Føroya til ES, aftaná at yvirgangur hevur rakt belgiska høvuðsstaðin í morgun. Sjálv visti hon ikki av nøkrum, fyrr enn hon var á veg til arbeiðis.
- Eg visti ikki av nøkrum fyrr enn eg sat á sporvogninum á veg til metrostøðina. Tá fekk eg eini sms-boð frá donsku tilbúgvingini, ið bað starvsfólkini siga frá, um tey vóru trygg aftaná spreingingarnar. Áðrenn tað visti eg einki um tær, men metroin var eisini stongd, tá eg kom fram, so eg mátti ganga restina av vegnum.
Bæði flogvøllurin og fleiri metrostøðir vórðu raktar í álopinum. Eina metrostøðin liggur beint við føroysku sendistovuni.
- Tað eru tríggjar metrostøðir, ið eru raktar, ið liggja við síðuna av hvørjum øðrum. Maelbeck støðin liggur bara 100 metrar frá sjálvari sendistovuni við einum av høvuðsvegnum her í Brússel, og út gjøgnum vindeyga síggi eg, at ein bilur frá herinum hevur stongt vegin. Annars sær alt friðarligt út.
Belgiska stjórin hevur boðað frá, at trygdarstigið verður hækkað upp á hægsta stig.
Sendikvinnan væntar eisini, at tað fer at merkjast á trygdini, men sigur, at trygdarstigið hevur verið høgt síðani yvirgangsálopini í Paris.
- Álopini fara at hava langtíðar avleiðingar fyri trygdina í býnum. Tíverri er tað longu vorðin ein vanlig sjón hjá okkum at síggja hermenn á gøtunum, tí síðani álopini í Paris hava vápnaðir hermenn staðið á varðhaldi uttanfyri sendistovuna.
