Í kvøld er seinasta umfarið leikt í grundspælinum í bestu svensku hondbóltsdeildini hjá monnum.
Tað eydnaðist Tróndi Mikkelsen (myndin) og liðfeløgum hansara í HF Karlskrona at vinna seg í endaspælið.
Karlskrona vann á útivølli 31-27 á Guif. Karlskrona var á odda 17-14 í steðginum.
Karlskrona endaði á einum áttanda plássi við 28 stigum, og teir skulu tí spæla fjórðingsfinalur - best av fimm - móti vinnaranum av grundspælinum, Kristianstad.
Rói Ellefsen á Skipagøtu og liðfelagarnir í Hallby taptu á útivølli 36-39 fyri Malmö, ið var á odda 21-20 í steðginum.
Rói skoraði fýra mál og legði upp til trý mál (assist).
Hallby endaði á fjórðaftasta plássinum við 19 stigum. Hallby skal tí spæla upp- og niðurflytingardystir móti fjórðfremsta liðnum í næstbestu deildini. Tað verður antin Varberg ella Kroppskultur.
Liðið hjá Ísaki Vedelsbøl, Sävehof endaði á einum sætta plássi við 31 stigum. Sävehof skal tí spæla fjórðingsfinalur móti triðfremsta liðnum, Hammarby.
