Hann skírdi Páll Holm Johannesen, sjónvarpsmann, at verða »ein politiskan svein hjá Javnaðarflokkinum« og spurdi, um tað er so livandi galið, at hann borðreiðir við eini saftigari konflikt millum Edmund Joensen og Kaj Leo Johannesen í bestu senditíð.
Nær er ein journalistur ein »politiskur sveinur« hjá einum flokki? Hvat meinar løgtingsmaðurin, fyrrverandi løgmaðurin, fólkatingsmaðurin og fyrrverandi løgtingsformaðurin við? Tað lystir okkum at vita. Er Páll Holm Johannesen limur í Javnaðarflokkinum? Kennir hann onkran javnaðarmann, ella hvat?
Heilt erligt Edmund. Hatta var undir beltið. Og hvat so, um ein miðil setir ljóskastaran á allar tær konfliktir, sum Edmund Joensen so ofta vartar upp við?
Nú skrivar Høgni í Jákupsstovu, redaktiónsleiðari, í aftursvari, at Edmund Joensen »hevur styrkt seg við einum albrynjaðum spunasmiði«. Tað er áhugavert at vita, hvør hesin spunasmiður við hesum óvanliga hvassa penni er. Tað plagdi at vera ein ávísur journalistur, men hann er vist farin aðrar leiðir.
Tað er einki forgjørt í, at ein politikari styrkir seg við spunasmiði ella spindoktara. Tað er í fínasta ordan. Men hví ikki spæla við opnum kortum og kunngera, hvør spunasmiðurin er? Tað ger man í øðrum londum.
Í øllum førum var hatta svarið hjá Edmundi illa spunnið.
