Fiskivinna
Tá ið manningin á rækjutrolaranum, Kappanum, kom aftur av Svalbards-leiðini herfyri, fingu teir at vita, at teir vóru uppsagdir, tí skiparaksturin gongur ikki.
Sambært stjóranum á Rækjuvirkinum, Hans Jóhannes á Brúgv, hevur fiskiskapurin hjá Kappanum verið nøktandi, men prísurin á rækjunum eru so lágur, at skiparaksturin hongur ikki saman.
Sum skilst, fara í løtuni samráðingar fram við fíggingarstovnar um, hvussu berast skal at fyri, at Kappin kann loysa aftur.
Tað er ikki eitt ár liðið, síðan O.C. Joensen á Oyri keypti Kappan fyri einar 20 miljónir. Skipið er bygt í 1971 og er nútímansgjørt fyri væl av peningi.
Í løtuni liggur skipið svínabundið norðuri á Oyri.
