Í dag hava borgarstjórin í Tórshavnar kommunu, Heðin Mortensen, og Sigurð í Jákupsstovu, rektari á Fróðskaparsetri Føroya, skrivað undir eina samstarvsavtalu.
Endamálið við avtaluni er at menna og skipa samstarvið millum Tórshavnar kommuu og Fróðskaparsetur Føroya við støði í visjónini hjá Tórshavnar kommunu og endamálinum hjá Setrinum. Ætlanin er í stigum at víðka um samstarvið til eina røð av evnum og økjum.
Setrið hevur sum visjón, at tað skulu vera 1.500 lesandi á Setrinum um 10 ár, móti teimum umleið 800 í løtuni. Tórshavnar kommuna hevur sum mál at verða altjóða universitetsbýur og vil tí vera virkin við nýggjum og mennandi útbúgvingartilboðum og dygdargóðum altjóða granskingarumhvørvi.
Landsstýrið boðaði fyrr í dag frá, at tað fer at seta 8 milliónir av til at gera universitetskampus. Setrið og kommunan fara tí nú av álvara í eina tilgongd at gera eina býarskipanarætlan, soleiðis at tað ber til hjá Setrinum at menna eitt universitetskampus við Debesartrøð og á Frælsinum, sum eisini gevur møguleikan at víðka universitetsøkið við tíðini.
