Fjøruti fólk eru deyð og hundraðtals av fólkum eru enn horvin eftir, at ein stóreldur hevur herjað amerikanska statin Kalifornia seinastu seks dagarnar og lagt túsundtals av húsum í oyði. Tað skrivar BBC.
Fleiri enn 10.000 brandmenn royna at basa teimum sekstan eldunum, ið tamarhald enn ikki eru fingnir á, men verður arbeiðið gjørt truplari av, at nógvur vindur hjálpir at spreiða eldin til nýggjar bygdir.
Sambært BBC, so er tað serliga býurin Santa Rosa, ið er hart raktur av náttúruvanlukkuni, og blivu 3.000 fólk flutt úr býnum leygardagin.
- Oyðileggingarnar eru ikki til at trúgva. Hetta er ein ræðuleiki, ið eingin kann ímynda sær, segði Jerry Brown, guvernørur í California, ið sigur at talan er um ein av størstu vanlukkum, ið nakrantíð hevur rakt statin.
Sambært BBC, so er talan um tann stóreldin í søguni hjá statinum, ið hevur kravt flest mannalív, og eru fleiri enn 100.000 fólk flutt burtur frá teirra heimum.
