Eina stóra viku undan fyrsta umfari í landskappingini spældu KÍ og B36 í kvøld venjingardyst í Klaksvík.
Í ikki serliga góðum fótbóltslíkindum vann KÍ 3-1 eftir 1-1 í fyrra hálvleiki.
B36 toppskjúttin í fjør, Sebastian Pingel, var fremsti maður hjá B36, og hann legði gestirnar á odda. Ein av nýggju monnunum, Bjarki C. Nielsen, átti uppleggið.
Nýggi B36 miðverjin, Lukas Enevoldsen, fór av vøllinum, tá ið ein hálvur tími var farin. Bjarni Petersen loysti hann av.
Boris Dosljak javnaði fyri KÍ við góðum skoti. Uppleggið átti ein av nýggju spælarunum, Claes Kronberg, sum var vongverji í vinstru.
Beinanvegin eftir steðgin varð nýggi álopsspælarin, Bob Sumareh, skiftur inn í KÍ álopið, og hann vísti seg at vera skjótur og málsøkin. Bob Sumareh legði KÍ á odda 2-1, tá ið Jóannes Bjartalíð átti uppleggið, og Bob Sumareh átti uppleggið, tá ið Páll A. Klettskarð staðfesti 3-1 heimasigurin.
B36 hevði fýra spælarar á beinkinum. Tíggju minuttir undan leikloki noyddist innskifti Bárður Olsen skaddur av vøllinum, og tá varð B36 undirmannað.
KÍ: Kristian Joensen - Jóannes K. Danielsen, Odmar Færø, Heini Vatnsdal, Claes Kronberg - Jákup B. Andreasen, Deni Pavlovic, Jóannes Bjartalíð - Boris Dosljak, Páll A. Klettskarð, Árni Frederiksberg. Í hálvleikinum og í seinna hálvleiki komu hesir inn: Børge Petersen, Bob Sumareh, Tóki á Lógv, Símun Kalsø og Olaf K. Hansen.
B36: Mathias Lamhauge - Benjamin Heinesen, Andrias H. Eriksen, Lukas Enevoldsen, Alex Mellemgaard - Mathias Thrane, Hugin Samuelsen - Martin Agnarsson, Ragnar Samuelsen, Bjarki Nielsen – Sebastian Pingel
Eftir hálvan tíma avloysti Bjarni Petersen Lukas Enevoldsen. Eftir steðgin loysti Magnus Holm Jacobsen Hugin Samuelsen av.
Í 66. minutti avloystu Bárður Olsen og Brian Jakobsen Mathias Thrane og Bjarka C. Nielsen.
