Svenski forsætisráðharrin, Ulf Kristersson, er á vitjan í Hvítu Húsunum, har hann skal umrøða svensku Nato-umsóknina við amerikanska forsetan, Joe Biden.
Tá Joe Biden tók ímóti Ulf Kristersson í dag, segði hann, at USA av fullum huga stuðlar svenskum limaskapi í hernaðarsamgonguni.
Amerikanski forsetin segði eisini, at hann við spenningi sær fram til, at svenska umsóknin verður góðkend.
Turkaland og Ungarn eru einastu Nato-limalond, sum hava sett seg upp ímóti, at Svøríki fær limaskap. Øll londini skulu vera samd fyri, at Nato kann taka nýggj limalond upp.
Bæði USA og Nato-aðalskrivarin, Jens Stoltenberg, hava sagt seg hava eina vón um, at Svøríki fær grønt ljós fyri Nato-toppfundin í Vilnius í næstu viku.
Men, so seint, sum í hesi vikuni endurtók turkiski forsetin, Recep Tayyip Erdogan, at hann framvegis ikki kann góðtaka Svøríki sum nýtt limaland í verjusamgonguni.
Tankar hava eitt nú verið frammi um, hvørt ein møgulig søla av amerikanskum F-16 stríðsflogførum til Turkalands hevði fingið forseta landsins at boygt seg fyri svenskum limaskapi.
Í dag viðgekk turkiski forsetin yvirfyri forsætisráðharranum í Niðurlondum, at Svøríki hevur tikið stig rætta vegin, tí landið eitt nú hevur sett í verk eina anti-yvirgangslóg.
Recep Tayyip Erdogan hevur annars lagt Svøríki undir at hýsa limum í yvirgangsbólkum, og í hesum sambandi hevur eitt nú kurdiski felagsskapurin PKK verið nógv frammi.
Turkaland metir PKK sum ein yvirgangsfelagsskap.
Hetta skrivar tíðindastovan NTB í kvøld.
