Vesturlendskar fregnartænastur meta seg vita, hvør Jihadi John, bøðilin hjá IS, er. Sambært enskum miðlum er veruliga navn hansara Mohammed Emwazi. Hann er uppvaksin í einum av ríkari býarpørtunum í vestara parti av London, nærindis Hyde Park, og las teldufrøði. Familjan flutti til Onglands úr Kuwait, tá hann var seks ára gamal.
Bretskir miðlar siga, at tað mest sermerkta við øllum er, hvussu vanligur hann tykist hava verið sum yngri. Mohammes Emwazi er elsti av seks systkjum. Hann legði stóran dent á sína útsjónd, lat seg væl í og hevur eftir øllum at døma verið ein góður skúlanæmingur. Hann hevur ongantíð verið í hóslag við løgregluna.
Tó so, tey seks árini eftir at hann varð liðugur at lesa, broyttist hann frá einum fittum tannáringi til eitt satt bølmenni, ein av ræðuligastu bøðlunum, vit hava sæð. Mohammed Emwazi, ella Jihadi John, skar høvdið av tveimum bretum, David Haines og Alan Henning, og kykmyndirnar vóru sendar um allan heimin.
Sum nógvir aðrir av teimum, ið ferðast úr vesturheiminum til miðeysturs at stríðasts, tykist tað sum, at Mohammed Emwazi er vorðin radikaliseraður í heimlandinum, í London. Bretska fregnartænastan MI5, sum var væl vitandi um Mohammes Emwazi áðrenn hann fór úr Onglandi, er nú fyri atfinningum um, at teir lótu hann sleppa til Sýria, hóast hann var á listanum yvir møguligar yvirgangsmenn.
