Í kvøld fer Jógvan Hansen aftur á pallin í íslendsku X-Factor sendingini. Hann er nú ein av teimum 4 seinastu luttakarunum, og finalu plássið er bert tvey fet burturi. Sum talið av luttakarum er minkað hevur Jógvan fingið alsamt harðari kapping. Nú eru fýra sera góðir sangarar eftir í kappingini. Heimildarmaður okkara í Reykjavík sigur tó, at flest øll vænta, at Jógvan fer at verða millum teir báðar síðstu luttakararnir, ið bresta saman í finaluni.
- Navnið Jógvan ljóðar øgiliga nógv líka sum “ég vann” á íslenskum, so fólk eru farin at kalla hann Ég Vann, greiðir Jens Guð frá.
Áhugin fyri kappingini er sera stórur, og allir fýra luttakarar eru vorðnir kend andlit í Íslandi, so kend, at sjónvarpsstøðin fyri at geva teimum frið, hevur sent teir til London hesa vikuna, greiðir Jens Guð frá. Hann sigur somuleiðis, at góðu úrslitini hjá Jógvani hava gjørt, at áhugin fyri stóru føroysku sýnisglugga konsertini AME-Reykjavík, ið verður komandi vikuskiftið er uppaftur størri.
Í seinastu sending vóru tað tvær kvinnur elsti luttakarin Inga Sæland og yngsti luttakarin Guðbjørg, ið vóru í vandabólkinum eftir, at hyggjararnir høvdu atkvøtt. Tá dómsnevndin skuldi taka avgerðina vóru tey ósamd. Ellý atkvøddi fyri at senda Guðbjörg heim og Einar atkvøddi fyri at senda Ingu Sæland heim. Tað var tí atkvøðan hjá Páll Óskari, ið gjørdist avgerandi og sendi Ingu heim.
