Havrannsóknarskipið, Jákup Sverri, er í løtuni á Føroyabanka og ger sínar regluligu váryvirlitstrolingar. Veðrið hevur verið vánaligt, men nú er blíðari veður.
Ætlandi kemur Jákup Sverri inn at landa tíðliga í morgin, mikumorgunin.
Í fleiri ár hevur toskastovnurin á Føroyabanka verið illa fyri, og her hevur eingin vinnulig toskaveiða verið í nógv ár. Hinvegin hevur nógv hýsa og ymisk onnur fiskasløg verið á Bankanum.
Spennandi verður at frætta, hvussu hesin túrurin fer at roynast.
Serliga er spenningur um toskin, men tað verður eisini áhugavert at fáa at vita, um hýsan á Føroyabanka framvegis er væl fyri.
Tilfeingið av Føroyabanka er fiskamatur í heimsflokki, og serstaki toskurin vekir áhuga - ikki bara í Føroyum, men eisini víða um lond.
Tá yvirlitstrolingar verða gjørdar á Føroyabanka - ávikavist á vári og um heysti - fæst gjarna so mikið av góðum toski, at afturvendandi Føroyabankakvøldini á Barbaru kunnu haldast.
Matstovan keypir av hesum góða fiski, sum tey síðan borðreiða niðri í gomlu Havnini.
Sagt verður úr matstovuvinnuni, at Føroyabankakvøld verða á Barbaru bæði fríggjakvøldið, 25. mars og leygarkvøldið 26. mars, og at stórur áhugi er fyri hesum afturvendandi tiltøkum.
##med2##
##med3##
