Sunnukvøldið fer Lars Olsen, landsliðsvenjari, at kunngera, hvørjar spælarar hann fer at boðsenda til landsdystirnar á útivølli ímóti Írlandi 7. juni og 11. juni ímóti Svøríki. Tað er longu greitt, at í hvussu so er tveir nýggir spælarar skulu boðsendast, og at tað verða í hvussu so er tvær stórar broytingar millum teir ellivu, sum verða sendir á vøllin ímóti Írlandi. Tað kemst av, at teir báðir, sum seinastu ferðirnar hava verið fastir á sentrala miðvøllinum, eru leikbannaðir. Tað snýr seg um Hall Hansson, sum júst er farin í summarfrí í AaB og superliguni, og tað snýr seg um liðformannin og veteranin Fróða Benjaminsen, sum higartil í ár hevur víst, at hann orduliga er komin fyri seg aftur, eftir at hann í fjør stóð eitt sindur veikari í myndini, enn hann áður hevur gjørt.
Nú er spurningurin, um tað eisini verður neyðugt at skifta út á høgra vongverjanum, har Jónas Þór Næs tey seinnu árini hevur verið rættuliga sannførandi. Orsøkin er tann, at Jónas týskvøldið í dysti fyri íslendska felag sítt Valur var so óheppin at bróta stórutá. Bæði í fyrradagin og í gjár var Jónas hjá lækna, og í gjár vóru boðini góð:
– Læknin segði, at talan er um reint brot, sum liggur væl. Hann roknar við, at tað verður grógvið saman aftur um tíggju dagar, og at tað tá verður møguleiki fyri aftur at spæla fótbólt, sigur Jónas Þór Næs úr Reykjavík.
Kemur illa við
Íslendska landskappingin er fýra umfør gomul, og tað hevur higartil gingið væl hjá Vali og Jónasi. Hann hevur spælt allar dystirnar á tamb. Tað var miðskeiðis í 2. hálvleiki i útidystinum í Garðabýnum ímóti Stjarnuni, at Jónas í nærdysti kendi nógva pínu í fótinum.
– Eg helt talan var um dygt slag, og at pínan fór at hvørva aftur. So eg spældi, inntil dysturin var liðugur. Tá eg vaknaði mikumorgunin varð tað mær greitt, at alt ikki ruggaði rætt. Eftir ein túr í røntguni varð staðfest, at talan var um brot. Í fyrstu atløgu útilokaði eg møguleikan at vera við í landsdystunum, men nú havi eg eina vón um, at tað skal bera til. Eg havi kunnað Lars Olsen um støðuna, og undir øllum umstøðum verður talan um kapprenning við tíðina, áðrenn landsliðið skal spæla, staðfestir skilagóði vongverjin úr Reykjavík, og hann fjalir ikki yvir, at hetta kemur sera illa við júst nú:
– Íslendska landskappingin er stutt, so tað er harmuligt at sita uttanfyri, tá ið tað er so stutt millum umførini. Hjá okkum hevur tað gingið væl higartil. Vit hava vunnið tveir dystir og spælt tveir javnar. Síðst Valur vann meistaraskapin var í 2007. Teir siga, at tað árið høvdu teir eftir fýra umfør vunnið tveir og spælt tveir javnar. Í fimta umfari ta ferðina spældu teir ímóti Keflavík, og tá var úrslitið 2-2. Næsti dysturin hjá okkum verður ímóti júst Keflavík. Sjálvandi harmar tað meg, at tað ikki ber mær til at spæla við, nú Keflavík og toppliðini og favorittarnir KR og FH bíða, men vit eru 20 spælarar, sum kappast um plássini, so maður kemur í mans stað, eru orðini frá einasta føroyinginum í fremstu deildini í Íslandi.
Putlispælið
Í hesum døgum leggja Lars Olsen og hjálparvenjari hansara Jóannes Jakobsen kabalina, sum skal vera liðugt løgd sunnukvøldið. Landsliðsvenjarin kom til Føroya í gjárkvøldið. Í kvøld fer hann til Fuglafirðar, og sunnudagin fer hann til Klaksvíkar, har hann ivaleyst fer at hava serliga vakið eyga við Pól Jóhannus Justinussen hjá NSÍ, og Hjalgrím Elttør, Atla Danielsen og Páll A. Klettskarð hjá KÍ.
Soleiðis sum vit hava skilt tað, so fer Jóannes Jakobsen sunnudagin til Gøtu, har Súni Olsen hjá B36 og Atli Gregersen og Erling Jacobsen hjá Víkingi skulu vigast.
Danska superligan var liðug mánadagin, og í vikuskiftinum fara spælararnir í summarfrí. Frítíðin er stutt og longu eftir landsdystin ímóti Svøríki 11. juni tørna spælararnir til aftur. Harvið verður eingin summarfrítíð hjá Silkeborg monnunum Gunnar Nielsen, Christian Lamhauge Holst og nýggja stjørnuskotinum í føroyskum fótbólti, 19 ára gamli vongverjanum Ára Mohr Jónsson, sum verður á U-21 landsliðnum, um Lars Olsen ikki velur at senda boð eftir honum.
Fjórði maðurin í superligu felag er René S. Joensen, sum er komin fyri seg eftir langan skaðasteðg í Brøndby.
HB er sannførandi topplið, og tað er ikki komið av ongum. Millum profilarnar á liðnum higartil hava verið miðverjin Jóhan Troest Davidsen og verjukendi miðvallarin Heini Vatnsdal. At teir eru á veg inn í putlispælið hjá Lars Olsen man vera rættuliga sannlíkt.
Hóast Fróði Benjaminsen og Hallur Hansson eru leikbannaðir ímóti Írlandi, so verða teir ivaleyst í ferðalagnum bæði til Írlands og til Svøríkis, har teir ivaleyst aftur vera millum teir fyrstu ellivu – sannlíkt saman við Jónasi Þór Næs, um hann vinnur kappingina við tíðina!
