Flestøll munnu vera samd um, at tað er gott, at løgreglan steðgar øllum ólógligum handli av hesum evnum, sum aloftast eru oyðileggjandi fyri fólk.
Tó er at undrast á, at vit her í Føroyum eru so ýðin eftir at døma fólk í isolatión, avbyrging. Vit hoyra um, at ung fólk eru avbyrgd ? fyrst í 14 dagar, og síðani verður hetta longt við 4 vikum aftrat, tilsamans 6 vikur = 42 dagar. Og tað tykist, sum er hugburðurin her á landi, at hetta er í fínasta lagi.
Undirritaða fer at tala ímóti hesum ræðuleika.
Í meira enn 25 ár hava klók fólk úti í heimi harðliga funnist at øllum formum fyri avbyrging, tá ið tað ikki er beinleiðis vandamikið fyri onnur fólk.
Isolatión er ein leivd úr miðøldini. Hon er ómenniskjanslig. Hon er sálarliga niðurbrótandi, eitt slag av torturi, og av somu orsøk hevur avbyrging verið vanligt amboð í einaræðis- og terrorstýrdum londum.
Sum dagarnir ganga, broytist tann avbyrgdi. Hann hevur eingi tilboð og einki sosialt samband og verður ofta tungur í huga. Hann fer at kenna seg gloymdan og plágast av tonkum sum, um hann man vera rættsiktaður, um hann hevur dagaskil, um nøkur framtíð er fyri hann. Verður hann fólk aftur? Ella hevði tað verið best at gjørt ein enda á øllum?
Túsundtals vitni greiða frá hesum í bókmentum úr allari verðini.
Í Føroyum veit almenningurin einki um, hvussu ein føroysk avbyrging í praksis fer fram. Tí hesir spurningar til fútan:
?Sleppur avbyrgdi at lesa?
?Sleppur avbyrgdi at lurta eftir útvarpi?
?Sleppur avbyrgdi at hyggja í sjónvarp?
?Sleppur avbyrgdi at tosa við lækna/sálarhirða?
?Sleppur avbyrgdi at venja likamið?
?Ella hevur avbyrgdi einans samband við onnur fólk undir avhoyringunum, og tá ið borðreitt verður í klivanum?
Eg heiti á avvarðandi løgtingsnevnd um at síggja til, at alt fer fram á rættan hátt.
Og eg heiti á Føroya Løgting um at virka fyri, at øll avbyrging í føroyskum varðhaldum heldur uppat alt fyri eitt.
