B36 skal í annaðkvøld spæla móti estiska Paide Linnameeskond, sum hevur fyrrverandi áleyparin hjá B36, Kaimar Saag, á liðnum. Fyri svenska miðverjan hjá B36, Isak Jönsson, er talan um fyrstu uppgávuna í Evropa.
- Tað kennist væl loksins at sleppa at spæla í evropeiskari kapping. Hesir dystirnir vóru eisini ein av høvuðsorsøkunum til, at eg skifti til B36 í vetur. Hetta verður kul, sigur hann í samrøðu við B36.
Í januar flutti 24 ára gamli Isak Jönsson úr svenska Trelleborg til Havnar. Hann trívist væl í B36-húsinum. Avrikini og skoðsmálini hava eisini verið góð. Hann hevur verið bæði stinnur og djarvur miðverji, skrivar B36.
- Eg eri sera væl nøgdur við tíðina í B36. Eg havi ment meg bæði leikliga og persónliga, og tað kennist eisini væl at vera við til at flyta liðið, sum er í støðugari framgongd. Besta dømið er, at eftir sekstan umfør í landskappingini hava vit bara tvey stig færri enn B36 skavaði saman í alt fjør, vísir hann á.
B36 vann sannførandi í Fuglafirði tann 1. juli, tá landskappingin eisini fór í summarfrí. Fyrireikingarnar til dystin ímóti estiska Paide Linnameeskond hava av somu orsøk verið drúgvari enn vanligt. Tað hevur eisini við sær, at hópurin er serliga væl útborin til hesa uppgávuna.
- Vit hava havt rúmari fyrireikingartíð, sum millum annað ger, at vit hava kunnað vant fleiri ávísar dystarstøður, sum tíðin annars ikki vanliga røkkur til. Áskoðararnir kunnu rokna við einum tøttum dysti. Ætlanin er at fáa tamarhald á dystinum beinanvegin, so tað verða vit, sum stýra dystargongdini, sigur Isak Jönsson við B36.
Fyrri dysturin verður á Ovara vølli í Gundadali í annaðkvøld. Returdysturin verður í Estlandi um eina viku.
