Yvirgangsfelagsskapurin Islamski Staturin er síðstu árini farin frá at vera ein ókendur bólkur, ið eingin hevði hoyrt um, til at vera mest umtalaði og vandamikli yvirgangsbólkurin síðstu mongu árini. Tað hevur bólkurin megna við at herseta stór landaøkir í Sýria og Irak og taka ábyrgdina fyri deydlig yvirgangsálop í Istanbul, Brússel, Paris, Egyptaland og aðrastaðni.
Nú heldur amerikanska herurin tó, at tað loksins er eydnast at knekka yvirgangsfelagsskapin. Sambært Pentagon, so hevur IS nevniliga mist tamarhaldið yvir 45 prosent av økinum í Irak, ið felagsskapurin vann á sumri í 2014, umframt at felagsskapurin hevur mist umleið 20 prosent av økinum, ið teir fyrr stýrdu í Sýria.
Millum teir býir, ið tað hevur eydnast kurdiskum uppreistrarbólkum, sýriska og irakska herinum, teimum sameindu og øðrum at vinna aftur, eru Palmyra í Sýria, og Ramdi og Heet í Irak.
Fyrr í vikuni segði amerikanski generalmajorurin Gary Volesky eisini, at tað var týðiligt í Irak, at yvirgangsfelagsskapurin var í ferð við at tapa stríðið, og misti landaøkir hvønn dag.
Hóast amerikanarar hava lyndið til at fegnast, so merkir tað ikki, at yvirgangsfelagsskapurin ikki er vandamikil longur. Seinastu vikurnar hevur IS framt fleiri bumbuálop á irakska høvuðsstaðin Baghdad, ið hava kravt yvir hundrað mannalív. Størsta álopið var týsdagin í síðstu viku, tá 72 fólk doyðu eftir at tríggjar bumbur brustu í Baghdad.
