-Ísrael verður javnað við jørðina, og ísraelsmenn grava sína egnu grøv, leypa teir á Libanon, sigur iranski forsetin, Mahmoud Ahmadinejad, sambært BBC.
-Eg mæli teimum til at pakka niður og at fara úr økinum, áðrenn teir verða innibyrgdir í eldinum, sum teir hava kynt í Libanon, leggur hann aftrurat.
Tað var Iran, sum legði lunnar undir Hizbollah-rørsluna í Libanon í 1982, men iranska stjórnin avsannar, at rørslan fær pengar ella vápn úr Iran. Stjórnin í Teheran hevur eisini avsannað, at tað var hon, sum mælti Hizbollah til at burturflyta tveir ísraelskar hermenn við libanska markið fyri tíggju døgum síðani.
Sýriska stjórnin hevur eisini kunngjørt, at hon heldur eyga við tí, sum hendir í Libanon, og embætismenn í Damaskus hava sagt, at Sýrialand fer ikki at góðtaka, at Ísrael ger innrás í Libanon.
Friðarlið úr ES
Ísraelski forsætisráðharrin, Ehud Olmert, segði í gjár, at Ísrael er sinnað at góðtaka, at friðarvarðveitandi hermenn úr ES-londunum fáa støð á markinum til Libanon. Hann legði afturat, at teir útlendsku hermenninir skulu fáa stuðul frá libanska stjórnarherinum.
Ísraelska verjumálaráðið hevur gjørt greitt, at álopini á mál í Libanon fara at halda fram minst eina viku afturat. Leiðarin fyri neyðhjálpararbeiðinum hjá ST, Jan Egeland, segði í gjár, at Ísrael brýtur altjóða fólkarættin við at bumba íbúðarhús í Libanon.
-Hetta má steðga alt fyri eitt, segði Egeland, sum metti, at umleið ein hálv millión libanar hava tørv á neyðhjálp.
