Vit heita inniliga á myndugleikarnar um at sýna Christiani Joensen virðing og geva honum tey grundleggjandi mennaskjaligu rættindi, at hann fær loyvi at búgva í sínum heimi.
Tað sigur Alzheimerfelagið nú í eini almennari fráboðan, eftir at tað kom fram í Degi og Viku fríggjakvøldið, at ætlanin er at flyta 80 ára gamla Christian Joensen, sum hevur demens, av Eysturoyar Ellis- og Røktarheimið í heimið á Mørkini í Sundalagnum.
Christian Joensen er av Oyri, men fyri skjótt 13 árum síðani fór hann á Eysturoyar Ellis- og Røktarheim, tí tað var ikki pláss fyri honum á heiminum á Mørkini í Streymnesi.
Men nú vil stýrið við VEKS, sum er eldrasamstarvið ímillum Vestmanna, Eiði, Kvívík og Sunda Kommunu, ikki rinda fyri hann longur, og tí skal hann flytast á røktarheimið á Mørkini í Streymnesi.
Tað halda bæði familjan og serfrøðingar í demens verða heilt burtur við, tí fyri fólk við demens hevur tað stóran týdning at tey kendum umhvørvi.
Tað kann hepnast væl at flyta fólk við demens, men tað kann eisini fáa álvarsligar avleiðingar fyri sjúkuna, og tí er tryggasta loysnin, at Christian Joensen verður verandi har hann er.
Og nú ger eisini Alzheimerfelagið vart við seg, og tey heita inniliga á stýrið fyri VEKS um at »sýna Christiani Joensen virðing og geva honum tey grundleggjandi mennaskjaligu rættindi, at hann fær loyvi at búgva í sínum heimi«, sum tey siga.
– Tað hevur eisini stóran týdning at vísa teimum avvarðandi fyrilit – tey sum í tí dagliga eru um viðkomandi við kærleika, hjálp og umsorgan.
Tað kostar 700.000 krónur um árið, at Christian Joensen býr á Eysturoyar Ellis- og Røktarheimi, og tey avvarandi hjá honum søgdu í Degi og Viku, at Veks hevur boðað teimum frá, at tey kunn sjálvi rinda fyri at hann verður búgvandi, har hann er.
Heðin Zachariasen, borgarstjóri á Suni, ásannaði eisini, at tað er av fíggjarligum orsøkum, at ætlanin nú er at flyta Christian Joensen.
– At bjóða teimum avvarðandi at halda fram við bústaðnum hjá Christiani Joensen fyri næstan ¾ millión kr. um árið er heilt burturvið, sigur Malan Mohr forkvinna í Alzheimerfelagnum.
