Skála Ítróttafelag hevur nú fingið sín nýggja formann eftir at tann nú fráfarni formaðurin, Rógvi Reinert Djurhuus, valdi at takka fyri seg á aðalfundi í síðstu viku.
Á nevndarfundi í kvøld hevur Skála-nevndin skipað seg av nýggjum, og nýggjur formaður er Ingi Hansen.
- Ingi hevur verið virkin í Skála ÍF í mong ár á nógvum ymsum postum. Bæði sum venjari, hjálparfólk og stevnusamskipari, og á øðrum økjum í felagnum er hann kendur, skrivar Skála IF á facebook.
- Nú hevur Ingi átikið sær leiklutin sum formaður í felagnum, og vit fegnast um at Ingi er til dystin fús í hesi krevjandi uppgávu, skrivar felagið víðari.
Nevndin í Skála Ítróttafelagi hevur skipað seg soleiðis:
Formaður: Ingi Hansen
Næstformaður: Per Mikkelsen
Kassameistari: Malena Jacobsen
Skrivari: Annika Klein
Nevndarlimir: Bogi Kallsberg og Teitur Reinert Joensen
