Høvuðsmistonkti vitjaði í New Orleans tvær ferðir mánaðirnar frammanundan álopið á Bourbon Street nýggjársaftan.
Tað boðar amerikanska samveldisløgreglan, FBI, frá í dag, skrivar tíðindastovan AFP.
Shamsud-Din Jabbar, sum verður hildin at standa aftanfyri álopið, vitjaði býin bæði í oktober og november.
Á súkklutúri undir vitjanini í oktober filmaði hann Bourbon Street gjøgnum sonevndar snildbrillur frá Meta.
Snildbrillur síggja út sum vanligar brillur, men tær hava innbygt myndatól.
Nýggjársaftan koyrdi Jabbar inn í eina mannamúgvu á Bourbon Street í einum leigaðum pick-up.
14 fólk lótu lív í álopinum og í minsta lagi 35 fingu skaða. Jabbar varð dripin í skotbardaga við løgregluna.
Hann var eisini í brillunum, tá hann framdi álopið, men myndatólið var ikki tendrað. Tey vórðu funnin á honum eftir deyða hansara.
Eitt flagg frá felagsskapinum Islamiskur Statur varð eisini funnið í pick-up-bilinum, umframt tvey skotvápn - ein pistól og ein rifla.
FBI hevur áður upplýst, at álopið verður mett sum eitt yvirgangsálop, og at gerningsmaðurin handlaði einsamallur.
Á tíðindafundi sunnudagin greiddi samveldisløgreglan frá virksemi hansara nýggjársaftan. Millum annað er komið fram, at hann setti eld á Airbnb-heimið, sum hann hevði leigað.
- Vit halda, at vón hansara var at brenna alt húsið niður fyri at goyma prógv, skrivar CNN.
Tað eydnaðist sløkkiliðnum at sløkkja eldin, og tilfar til spreingievni varð funnið í heiminum. Líknandi tilfar varð funnið í heiminum hjá Jabbar í Texas.
Sunnudagin kom eisini fram, at Jabbar ferðaðist bæði til Egyptalands og Kanada í 2023. FBI kannar, um túrarnir hava samband við álopið á nýggjárinum.
42 ára gamli Jabbar var amerikanskur ríkisborgari og uppvaksin í statinum Texas.
Hann hevur fyrr verið í amerikanska herinum í 13 ár og varð útsendur til Afghanistan í eitt ár.
/Ritzau/
