Fyrr í kvøld lósu vit um, at franski forsetin, Emmanuel Macron, hevur bjóðað toppleiðarum í fleiri evropeiskum londum til skundfund í París.
Ráðstevnan kom í lag, eftir at ábendingar hava verið um, at Russland hevur gjørt ávís framtøk í krígnum í Ukraina.
Í greinastubbanum varð forsætisráðharrin í Slovakia, Robert Fico, endurgivin fyri at siga, at fleiri limalond í Nato og ES umhugsa at senda herfólk til Ukraina gjøgnum sínámillum avtalur.
Robert Fico legði aftrat, at hetta er eitt av evnunum á fundinum millum evropeiskar toppleiðarar í franska høvuðsstaðnum.
Í kvøld endurgevur tíðindastovan, Reuters, franska forsetan, Emmanuel Macron, fyri at siga, at ongar ítøkiligar ætlanir fyriliggja um at senda herdeildir inn í Ukraina.
- Men, hetta kann heldur ikki útilokast. Vit mugu gera alt fyri, at Russland ikki vinnur kríggið í Ukraina, sigur Emmanuel Macron sambært Reuters.
