Sum heild hevur tað verið rættiliga friðarligt hjá løgregluni hetta vikuskiftið. Síðstu nátt stóðu fleiri bilar fastir í kavanum, tí bilførarar tóku ikki ávaringarnar frá Landsverki í álvara um at lata bilin standa.
Løgreglan sigur, at í gjár sá út til, at bilførarar hava lurtað betri eftir, tí tað var lítið av bilum at síggja - serliga tá ið hugsað verður um, at tað var síðsti leygardagur fyri jól.
Men annars hendu onkur smávegis ferðsluóhapp í hálkuni, men tað hevði lítið upp á seg. Hinvegin vórðu tveir bilførarar tiknir fyri at koyra við kenning. Annar varð tikin í vanliga eftirlitinum hjá løgregluni og hin varð tikin í sambandi við eitt ferðsluóhapp.
Løgreglan varð boðsend til eitt ferðsluóhapp í nátt har tveir bilar høvdu stoytt saman. Sjálvt óhappið hevði ikki so nógv upp á seg, men annar bilførarin er skuldsettur fyri at koyra við kenning.
Í nátt hevur tað verið gott kavaveður, so nakað av fólki var í býnum. Og løgreglan sigur, at tveir mans vóru so ólátaðir í býnum, at teir fáa hvør sína bót fyri at bróta skilhaldsreglurnar.
