Magni Arge, fólkatingsmaður fyri Tjóðveldi, spyr heilsmálaráðkvinnuna Ellen Trane Nørby um fosturtøkur.
Hann vil hava at vita um tað finnast hagtøl fyri hvussu nógvar kvinnur, búsitandi í Føroyum, hava verið í Danmark og fingið eina fosturtøku framda tey seinastu 20 árini.
Magni Arge sigur, at sambært seinastu hagtølunum, so verða 36 fosturtøkur framdar í Føroyum av hvørjum 1000 barnsburðum, meðan sama tal í Danmark er 259 fosturtøkur fyri hvørjar 1000 barnsburðar. Magni Arge sigur, at ein orsøk kann verða, at galdandi lóg í Føroyum er frá 1956, meðan tann danska fosturtøkulógin er frá 1973 og er ikki eins avmarkandi sum tann galdandi í Føroyum.
Ein orsøk kann verða, at tað fara fleiri føroyskar kvinnur til Danmarkar at fáa fosturtøku og tí ikki síggjast aftur í føroysku hagtølunum. Tí spyr hann Ellen Nørby um tað finnast donsk tøl fyri hvussu nógvar føroyskar kvinnur fara til Danmarkar at fáa fosturtøku.
