Hvønn veg skulu fakfeløg venda kanónini

Hvørjir eru vinirnir og hvørjir eru fíggindanir hjá føroysku fakfeløgunum. Eru gomlu fíggindarnir, arbeiðsgevararnir, nú samstarvsfelagir og eru politikararnir nú vorðnir teir veruligu fíggindarnir hjá føroysku fakfeløgunum?

Tað er evnið í beinleiðis kjaksending á Rás2 klokkan 16 í dag.

Tey, sum fara at kjakast um evnið, saman við vertinum, Óla Breckmann, eru Selma Ellingsgaard, forkvinna í Starvsmannafelagnum, Sonja Jógvansdóttir, talskvinna fyri Samtak, og Jørgen Niclasen, landstýrismaður í fíggjarmálum.

Í upplegginum til kjakið vísir Óli Breckmann á, at  sjálvan 1. mai, vísti Hans Joensen, formaður í Havnar Arbeiðsmannafelag, á í Degi og viku, at Fíggjarmálaráðið er mótparturin hjá føroysku verkafjøldini.

 
Í somu sending vísti hann á arbeiðsgevaran meiri sum einum samstarvsfelagaða hjá teimum tímaløntu, ið ein sáttmáli skuldi fáast upp á pláss við.

 
- Hetta er fyrstu ferð, at ein formaður fyri eitt verkamannafelag alment hevur gjørt vart við, at tað mest av øllum er skatturin, ið tað almenna áleggur øllum borgarum, sum skerjir keypiorkuna hjá tímaløntum føroyingum.

 
- Tað er upp á tíðina, at føroyski verkamaðurin og verkakvinnan ásanna, hvør ger seg mest inn á teirra inntøku, sigur Óli Breckmann.

 
- Ein hevði nú eisini væntað, at Hans Joensen kundi víst yvir á Ráðhúsið í Havn og sagt, at ígjøgnum kommuniskattin, eru føroyskar kommunur, øllum føroyingum við undir hálvari miljón í ársinntøku, ein beiskari biti at svølgja enn landskassin.

 
- Tað er nevniliga ein sannroynd, at kommunuskatturin nívir lág- og miðalinntøkurnar meiri, enn landsskatturin ger.

- Jú lægri inntøku, løntakarar hava, jú lutfalsliga størri skaða ger kommunuskatturin teirra keypiorku.