Hondbóltsútisetar: Rói toppskjútti við 10 málum fyri HØJ

Landsliðsspælarin, Rói Berg Hansen var flúgvandi og gjørdist toppskjútti hjá HØJ, ið spældi javnleik 32-32 móti Grindsted á heimavølli í næstbestu donsku hondbóltsdeildini. Í steðginum var Grindsted á odda 19-15. 

Tá átta minuttir vóru eftir av dystinum var Grindsted á odda 31-29. Tað eydnaðist HØJ at javna til 31-31, og so kom Grindsted á odda 32-31 áðrenn tað í seinasta minuttinum eydnaðist HØJ at javna og tryggja sær eitt stig. 

Komandi leygardag verður føroyingauppgerð millum liðið hjá Brandi Halgirssyni, Ajax og HØJ.

Dysturin Ajax skuldi spæla á heimavølli móti HEI Skæring í dag var avlýstur. 

Leivur Mortensen skoraði tvey mál fyri Odder, ið vann 33-24 á Roskilde á heimavøllli. Í fyrra hálvleiki leikaði javnt á, og var Odder bara á odda 13-12 í steðginum. Í seinna hálvleiki var klassamunur.

Komandi leygardag spælir Odder á útivølli móti FIF. 

Rókur Akralíð skoraði eitt mál tá lið hansara, Odense á útivølli tapti sera tepurt 30-31 fyri Team Sydhavsøerne. Í steðginum var heimaliðið á odda 13-12,

Tá ein minuttur var eftir at spæla var heimaliðið á odda 31-28. Tað eydnaðist Odense at skora tvey mál, men tað var akkurát eitt mál ov lítið til at fáa stig við sær aftur til Odense.

Longu mánakvøldið spælir Odense heimadyst móti Otterup. Ein dystur Rókur og liðfelagarnir mugu vinna fyri at vinna seg úr botninum. 

Í morgin tekur liðið hjá Sjúrði Olsen og Teis Horn Rasmussen, Tønder móti oddaliðnum, Midtjylland á heimavølli.