Nýtilnevndi franski forsetin, François Hollande, hevur í dag tilnevnt tann 62 ára gamla Jean-Marc Ayrault nýggjan forsætisráðharra. Tað kunngjørdi talsmaður forsetans, Pierre-René Lemas, seinnapartin.
-Forsetin hevur tilnevnt Jean-Marc Ayrault stjórnarleiðara og biðið hann skipa nýgja stjórn, segði talsmaðurin.
Jean-Marc Ayrault (myndin) tekur við sum forsætisráðharri eftir Francois Fillon, sum Nicolas Sarkozy setti í embætið. Tann nýggi forsætisráðharrin er útlærdur lærari í týskum, men hevur verið virkin í politikki í næstan 40 ár. Eitt nú var hann eitt skifti formaður í París-deildini hjá Sosialistaflokkinum, og tey seinastu árini hevur hann verið borgarstjóri í býnum Nantes.
