Miðhøgrasamgongan Democratic Alliance (AD) væntast at vinna flestar atkvøður á portugisiska valinum, vísa kanningar á valstøðum, skrivar Reuters.
Tað vísa trý valstøð, sum meta AD fáa millum 29 og 35,1 prosent av atkvøðunum.
Á odda fyri politisku samgonguni er sitandi forsætisráðharrin Luis Montenegro.
AD tykist at fáa framgongd frá seinasta vali í 2024. Her fekk AD umleið 29 prosent av atkvøðunum.
Tað verður tó framvegis ikki nóg mikið til at fáa meiriluta á tingi, sum krevur 42 prosent av atkvøðunum.
Eftir valið í 2024 skipaði Montenegro eina minnilutastjórn.
Men eftir umleið eitt ár við valdinum tapti forsætisráðharrin eina álitsatkvøðu í landsins tjóðartingi.
Hetta hendi eftir ákærur um áhugamálsstríð í familjufyritøkuni hjá forsætisráðharranum.
Hann tapti atkvøðugreiðsluna og endaði við at útskriva val.
Hetta er triðju ferð í trý ár, at val hevur verið í Portugal.
Sambært Reuters verður næststørsti flokkur væntandi miðvinstri Sosialistiski flokkurin (PS). Sambært exit-kanningum standa tey til at fáa millum 19,4 og 26 prosent av atkvøðunum, skrivar Reuters.
Í hølunum á teimum er tjóðskaparkonservativi Chega, sum sambært veljarakanningunum fær millum 19,5 og 25,5 prosent.
Chega kann tí fáa avgerandi støðuna á tingi.
Men, eins og í fjør, hevur Montenegro fleiri ferðir noktað, at AD fer at gera samgongu við Chega.
Chega við fyrrverandi ítróttarviðmerkjaranum André Ventura á odda er talsmaður millum annað fyri harðari revsing fyri brotsmenn og einum strangari tilflytarapolitikki.
Undan valinum í ár hevur Chega verið raktur av eini røð av gølum, tí tríggir flokslimir hava verið ákærdir fyri brotsverk.
Enn sær flokkurin út til at halda fram við teirri munandi framgongdini, sum hann sá í 2024, tá hann fekk umleið 18 prosent av atkvøðunum.
/Ritzau/
