Føroyska telefelagið Hey bjóðar nú sínum kundum eina nýggja tænastu, har tað ber til at deila data ímillum vinir, familju og kenningar. Nýggja tænastan hevur fingið heitið Gev data.
Í tíðindaskrivi sent fjølmiðlunum verður upplýst, at talan er um eina tænastu, ið kundar kring landið hava saknað.
- Vit hava spurt okkum fyri hjá alskyns fólki kring oyggjarnar hvat tey ynskja sær allarmest frá sínum televeitara, og mest umbidna ynski var at sleppa at geva burturav sínum data til onnur, ið hava størri tørv á tí. Okkara mál er at gera føroyska telemarknaðin meira kundavinarligan og tí hava vit nú ment tænastun a Gev data, har Hey kundar kunnu geva øðrum Hey kundum av sínum óbrúkta data, sigur Rói B. Poulsen, privatkundastjóri í Hey.
Talan er um triðju ferð innan fáa mánaðir, at telefyritøkan boðar frá eini nýggjari tænastu. Áður hevur fyritøkan kunngjørt Datarull, har til ber at goyma óbrúkt data til næsta mánað, og Bjóða við, har tú fært data fyri at bjóða øðrum at gerðast kundi hjá Hey.
