Afghanin Abdul Rahman, sum valdi at taka við kristnari trúgv, vil vera við, at hevði hann ikki sloppið úr heimlandinum, hevði trúarskiftið kostað honum lívið. Abdul Rahman var ákærdur fyri at hava vent islamsku trúnni bakið, men eftir áheitan frá pávanum og ST varð hann latin leysur.
Mikunáttina varð hann smuglaður út úr Afghanistan til Italia, har hann býr á einum loyniligum staði. Í gjár fingu italsk tíðindafólk høvi at tosa við hann, og tá nýtti Abdul Rahman høvi til at takka pávanum fyri hjálpina. Hann var heldur ikki í iva um, at pávin og ST høvdu bjargað lívi hansara.
Eg eri vísur í, at teir høvdu gjørt av við meg. Ert tú annað enn muslimur í einum muslimskum landi, verður tú tikin av døgum, segði hann við tey italsku tíðindafólkini.
Benadikt pávi XVI sendi tann 23. mars afghanska forsetanum, Hamid Karzai, eitt bræv við áheitan um at sleppa rættarmálinum ímóti Abdul Rahman. Tað sama gjørdi ST, og italska stjórnin hevur játtað honum friðskjól í Italia.
