Kendi ferðamiðilin Lonely Planet hevur valt Føroyar sum eitt av fremstu ferðamálum í 2021. Tað fortelur Visit Faroe Islands í einum tíðindaskrivi í morgun.
Í síni grundgeving fyri tí sigur dómsnevndin, at Føroyar gevur ferðafólki autentiskar og ógloymandi upplivilsir, ið geva nakað aftur til samfelagið.
Hetta er ein heiðurslønin, ið verður latin á hvørjum ári og í dómsnevndini eru fremstu serfrøðingar hjá Lonely Planet í ferðavinnu.
Í grundgevingini sigur dómsnevndin, at tey eru hugtikin av, hvussu Føroyar áhaldandi velja at halda seg frá hópferðavinnu, og ístaðin leggja dent á at geva ferðafólki eina meira autentiska og persónliga ferðavinnu, har dentur verður lagdur á at geva ferðafólki tætt samband við føroyingar og føroysku mentanina. Tey vísa millum annað á heimablídni, Hoyma konsertir og Closed for Maintenance átakið sum dømi.
Guðrið Højgaard, stjóri í Visit Faroe Islands, sigur í tíðindaskrivinum, at hetta er ein stórhending Føroyar. Men hon leggur afturat, at orsøkirnar til, hví vit fáa hesa viðurkenningina, ger tey serstakliga fegin.
Hetta týðir uppá, at tað, sum vit løgdu út í kortið í okkara menningarætlan fyri ferðavinnuna, hevur riggað, og tað er ein staðfesting av, at vit eru á rættari leið, sigur hon.
