Filmshúsið og Betri hava nú gjørt eina avtalu, sum tryggjar føroyskum filmi tríggjar milliónir at arbeiða við hesi næstu trý árini.
Stuðulin skal brúkast til at menna nýggjar føroyskar søgur á filmi ella í sjónvarpsrøðum, umframt at menna tey, sum fáast við film, og at stuðla ítøkiligum verkætlanum við munagóðum upphæddum.
Tað er Stuðulsgrunnurin hjá Betri, sum setir tríggjar milliónir av til filmsvinnuna í Føroyum. At stuðla føroyskum filmi er at stuðla føroyskum máli, føroyskari mentan og føroyskum listagreinum, sigur Aslaug Gísladóttir, forkvinna í Betri stuðul.
Hon leggur afturat, at filmsvinnan í Føroyum er í menning, men enn er tann almenni stuðulin ikki á sama stigi, sum í grannalondunum, sigur hon.
– Vónin er, at føroyskar søgur á filmi verða ein sjálvsagdur partur av okkara mentanarliga palli, sigur Aslaug Gísladóttir.
Í hesum sambandi skal stuðulin brúkast til trý øki. Eitt øki er at stuðla størri verkætlanum, umframt til at menna verkætlanir frá hugskoti til framleiðslu. Og í triðja lagi skal stuðulin brúkast til skeið og onnur tiltøk, sum hava til endamáls at menna yngru spírarnar, sum gera film.
– Tríggjar milliónir hesi næstu trý ár kunnu av álvara gera mun, sigur Tina í Dali Wagner, dagligur leiðari í Filmshúsinum í tíðindaskrivi. Tað er eitt rættiligt nýbrot, at ein privat fyritøka stuðlar upp á hendan mátan, sigur hon
