Í dag varð kunngjørt hvussu landsliðini verða styrkismett til EM 2016 undankappingina. Londini eru deild í seks bólkar. Tað eru níggju lið í hvørjum styrkisbólki uttan í lægsta styrkisbólkinum.
Frakland, sum er vertstjóð fyri EM endaspælinum í 2016, verður við í undankappingini, so at allir bólkarnir hava níggju lið. Tó so, so telja dystirnir móti Fraklandi einki, tí vertstjóðin hevur longu tryggja sær pláss í endaspælinum, sum kemur at telja 24 lond.
Nummar eitt og tvey í bólkunum koma beinleiðis víðari til endaspælið saman við vertstjóðini, umframt at tann besti 3'arin somuleiðis koma beinleiðis víðari. Hinir átta 3'arnir skulu spæla sokallaðar "Play-off" dystir um fýra tey seinastu plássini.
Gibraltar er við á fyrsta sinni, eftir at teir fingu UEFA limaskap. Hetta hóast Spania mutaði í móti. UEFA hevur eisini avgjørt, at Spania og Gibraltar ikki kunnu koma í bólk saman. Tað kunnu Aserbadjan og Armenia heldur ikki av politiskum orsøkum. Russland og Georgia hava fyrr verið í somu støðu, men hesa ferð kunnu tey koma í bólk saman.
Lutakastið til EM 2016 undankappingina verður í Nyon í Sveis 23. feburar.
Her eru styrkisbólkarnir:
Styrkisbólkur 1: Spania (Verandi EM vinnarar), Týskland, Holland, Italia, Ongland, Portugal, Grikkaland, Russland, Bosnia og Hersegovina
Styrkisbólkur 2: Ukraina, Kroatia, Svøriki, Danmark, Sveis, Belgia, Kekkia, Ungarn, Írland
Styrkisbólkur 3: Serbia, Turkaland, Slovenia, Ísrael, Norra, Slovakia, Rumenia, Eysturríki, Pólland
Styrkisbólkur 4: Montenegro, Armenia, Skotland, Finnland, Letland, Wales, Bulgaria, Estland, Hvítarussland
Styrkisbólkur 5: Ísland, Norðurírland, Albania, Litava, Moldova, Makedonia, Aserbadjan, Georgia, Kýpros
Styrkisbólkur 6: Luksembourg, Kasakstan, Liktinstain, Føroyar, Malta, Andorra, San Marino og Gibraltar
