Aldursforsetin, liðskiparin og leikandi hjálparvenjarin hjá nýklaktu føroyemeistarunum úr B36, Jákup á Borg, má nú fáa sær eina nýggja tatovering. Hann hevur nevniliga tatoverað eina stjørnu á armin fyri hvørja ferð hann hevur vunnið føroyameistaraheitið.
9-talið hevur verið trúðfasti fylgisveinur á bakinum alla fótbóltsleiðina í føroyskum fótbólti, og tað er eisini eitt 9-tal, ið er tatoverað á høgra arm prýtt við stjørnunum, ið staðfesta, hvussu ofta hann hevur verið føroyameistari í fótbólti.
Í gjár var tað sættu ferð, at Jákup á Borg gjørdist føroyameistari. Árini eru 1997, 2001, 2004, 2006, 2011 og 2014. Fýra eru vunnin við barndómsfelagnum B36, meðan hini bæði – í 2004 og 2006 – eru vunnin við HB.
