Ein amerikanskur hermaður, sum fall í Fraklandi undir fyrra heimsbardaga fyri 92 árum síðani, er nú jarðaður á hernaðarkirkjugarðinum Arlington uttan fyri Washington. CNN sigur, at hrmaðurin, sum æt Thomas Costello, fekk eina virðiliga jarðarferð við hornblástri og heiðursskotum.
Thomas Costello, sum var ættaður úr New York, fór upp í amerikanska herin tann 19. september í 1917. Eitt ár seinni, tann 16. september í 1918, doyði hann í bardaga nærhendis Jaulny har norðuri í Fraklandi. Hann bleiv jarðaður saman við tveimum øðrum hermonnum í skóginum millum Bois de Bonvaux og Bois de Grand Fontaine. Systir hansara royndi í fleiri ár at fáa leivdirnar av bróðurinum heim til USA, men til fánýtis.
Fyri fýra árum síðani komu nakrir fransmenn av tilvild fram á grøvina við teimum trimum amerikonsku hermonnunum, og nú er Thomas Costello komin á amerikanska jørð.
