Hetta er gjørt í kjalarvørrinum av public service sáttmálanum, sum er gjørdur millum Mentamálaráðið og Kringvarpið.
Landsstýriskvinnan hevur havt fund við privatu miðlarnar, og hon ynskir, at kannað verður, hvørji tiltøk kunnu bøta um støðuna á fjølmiðlamarknaðinum, so tryggjað verður, at vit hava eitt breitt útboð av fjølmiðlatænastum til gagns fyri land og fólk.
Fjølmiðlakommissjónin skal viðgera spurningar sum t. d. um kringvarpsbygnaðurin skal vera sum hann er, ella eru aðrir møguleikar, skal Kringvarpið t.d. umskipast til eitt alment partafelag e.l.? Hvussu kann Kringvarpið fíggjast í framtíðini, samstundis sum vit á bestan hátt tryggja, at eitt úrval av privatum fjølmiðlum (bløð, portalar og sendistøðir) kunnu virka og halda ásetingar um góðan fjølmiðlasið?
Hesi manna fjølmiðlakommissjónina:
Martin Næs, deildarstjóri, formaður, Høgni Reistrup, cand. mag., skrivari, Katrin D. Apol, cand. mag, Enna G. Mikkelsen, cand. mag., tíðindakvinna, Sigmund Poulsen, advokatur, Ina Hyttel Hammershaimb, cand. oecon., Alda Joensen, fulltrúi, samskipari.
Landsstýriskvinnan ynskir at fáa eitt álit við tilmæli um, hvussu víðari skal farast fram, tá ið tað snýr seg um føroyskan fjølmiðlapolitikk. Eitt álit, sum kann leggjast fyri politiska myndugleikan til nærri viðgerðar. Fjølmiðlakommissjónin skal skipa fyri, at avvarðandi fyritøkur, stovnar og feløg, ið onkursvegna varða av ella arbeiða í miðlaheiminum, verða hoyrd og fáa møguleikar at føra síni sjónarmið fram fyri fjølmiðlakommissjónina.
Ætlanin er, at fjølmiðlakommissjónin skal verða liðug við sítt arbeiði á ólavsøku í 2011.
