HB - AB 5-1 (2-0)
Gjárdagurin var nýggjur tindur í skjótu og stóru menningini hjá nýggja HB miðvallaranum Heina Vatnsdal. Hann skoraði bæði til 1-0 og 2-0 í trivaliga 5-1 heimasigrinum á AB. Uppskriftin var tann sama báðu ferðirnar. Skjóti og sterki maðurin við góða bóltførleikanum og spælskilinum rann seg leysan innanfyri ikki sannførandi verjuna, og ávikavist Andrew av Fløtum og Christian R. Mouritsen spældu hann blankan.
HB er níggju stig frammanfyri næsta liðið, og harvið kennist vegurin slættur og breiður fram ímóti FM heitinum.
Heini Vatnsdal fegnast um landsliðsúttøkuna í gjárkvøldið, og í felagshøpi hugsar hann eisini um altjóða avbjóðingina:
– Felagið er væl skipað, og tað gongur væl í landskappingini. Nú skulu vit spæla í europeisku kappingini, og tað er upplagt, at vit leggja nógv fyri í royndini at vinna okkum víðari í tí kappingini, heldur HB miðvallarin.
AB miðvallarin Rógvi Poulsen var millum argjamenninar, sum løgdu rygg til næststørsta tapið í á – fyrr í ár tapti AB 6-0 í Streymnesi. Rógvi hevur áður spælt við HB, og hann ivast í, um hetta HB liðið er betri enn undanfarin:
– HB hevur gott lið og breiðan hóp. Men tað kann væl vera, at munurin millum HB og hini í ár sammett við undanfarin ár er, at hini liðini eru veikari, enn tey hava verið.
Hvussu sært tú upp á tykkara avrik í dag?
– Vit royndu at leggja trýst á teir frammarlaga á vøllinum, men tað miseydnaðist, og so vórðu vit sektaðir. Tað eru framvegis nógv stig at spæla um, og eg rokni framvegis við møguleikanum, at vit skulu varðveita plássið í bestu deildini, men tað verður torført.
Veteranarnir Andrew av Fløtum og Fróði Benjaminsen øktu um leiðsluna til 4-0, áðrenn innskifti Ahmed Keita minkaði um munin, og HB miðverjin Gunnar Haraldsen staðfesti 5-1 sigurin, sum saman við 4-0 í Runavík er størsti HB sigurin í ár.
– Ferðin dalaði, tá ið vit vóru frammanfyri við fýra málum, og kanska órógvaði tað, at vit skiftu so nógv út, heldur Heini Vatnsdal, sum nú – umframt FM heitið – hevur fokus á landsliðsferðini til Írlands og Svøríkis og droymir um, at HB skal spæla seg víðari í europeisku kappingini, sum ikki er so langt burtur.
