Almanna- og heilsurøktarafelagið og Føroya Psykiatrifelag fóru seinnapartin leygardagin í søguna, tá tey á einum felags aðalfundi blivu løgd saman í eitt nýtt felag, sum eitur Heilsurøktarafelagið.
Tilgongdin til samanleggingina finst afturi í 2007, tá feløgini saman skrivaðu sáttmála, umframt at síðani 1993 hevur talan í veruleikanum verið um ein fakbólk, sum er blivin umboðaður av tveimum fakfeløgum.
Á aðalfundinum leygardagin var vald nýggj nevnd, og í henni sita Majbritt Mohr, forkvinnu (myndin), Kerstin Laksáfoss, Johanna Henriksen, Sveinbjørn Olsen og Gunvør Sigurðsson, og felags fyri øll hesi er, at tey frammanundan sótu í nevnd í gomlu feløgunum.
