Tað kom sum ein skelkur hjá Neista-kvinnunum, tá tær í farnu viku fingu boð um, at Kári Horn gavst sum venjari.
– Eg havi fingið boð um, at eg havi ein kroniska tarmsjúku, og fyrst og fremst ræður um at fáa tamarhald á hesum. Eg fekk boðini í farnu viku, og so skjótt sum dysturin seinasta vikuskifti var av, valdi eg at boða frá hesum. Samstundis játtaði eg, at eg skuldi hjálpa til, inn til nýggjur venjari var funnin, sigur Kári Horn, sum tó játtaði at taka eitt seinasta tørn sunnudagin, tá Neistin vitjaði í Vestmanna.
– Og eg rokni við, at felagið finnur eina loysn til ta tíð. At venja kvinnurnar hjá Neistanum átti í øllum førum at verið eitt venjarastarv, sum fleiri hava stóran áhuga í, heldur Kári Horn, sum sjálvur kallaði tað fyri eitt dreymastarv, tá hann fekk møguleikan fyri hálvum øðrum ári síðani.
Gevst tú so fullkomuliga sum venjari, ella er talan um fyribils steðg?
– Vónandi er hetta bara fyribils. Boðini frá læknunum eru í øllum førum, at tá tamarhald er fingið á sjúkuni, kann eg liva eitt púra vanligt lív, men her og nú skal eg ansa mær eitt sindur. So vónandi kann eg aftur hugsa um hondbóltsvenjing, tá komandi kappingarár byrjar, sigur Kári, sum sjálvandi harmast støðuna, sum er íkomin.
– Hetta er jú ikki tað, sum eg hevði roknað við. Vit hava fleiri týðandi dystir fyri framman, og tí er timingin avgjørt ikki serliga góð, men eg noyðist sjálvandi fyrst og fremst at lurta eftir tí, sum læknarnir siga, staðfestir Kári.
- - -
Neistin leitar enn
Fleiri leysir fyrispurningar hava verið, men enn hevur ikki eydnast Neistanum at seta nýggjan venjara fyri Kára Horn, sum helst stóð á odda fyri Neistakvinnum fyri seinastu ferð í vetur, tá tær spældu í Vestmanna.
Sum skilst hava tey í Neistanum verið í samband við nakrar møguligar kandidatar til starvið, men enn er einki avgjørt í so máta. Talan er um støðu, sum er íkomin rættiliga brádliga, og hjá flestu av teimum, sum vanliga fáast við hondbóltsvenjing í fremstu røð í Føroyum, er støðan tann, at tey longu hava venjarastarv í øðrum felag.
Sum nevnt aðrastaðni á síðuni, so hevur Kári Horn sagt, at dysturin í Vestmanna var tann seinasti, og tað vil við øðrum orðum siga, at Neistin nú hevur seks dagar til at finna eina loysn, áðrenn tær spæla sera týðandi grannauppgerðina móti Kyndli.
