Í kvøld heldur Heiðrikur á Heygum sína seinastu konsert á hesum sinni, og verður tað í Reinsarínum. Heiðrikur á Heygum, ið hevur verið at hoyrt á fleiri festivalum í summar, bjóðar nú til sína seinastu konsert á hesum sinni. Hann endar nevniliga sítt summar við einari konsert í Reinsarínum í kvøld kl. 19.00.
Heiðrikur fer í høvuðsheitinum at framføra nýggj løg, ið eftir ætlan skulu á útgevast á einari fløgu, sum kemur út fyrst í komandi ári. Og nýggju løgini eru nakað øðrvísi enn tað, vit áður hava hoyrt frá Heiðriki.
-Eg haldi, at nýggju løgini ímynda ein meira búnan Heiðrik, meðan gamla fløgan var ímyndin av mær, tá ið eg var 18 ár og heldur óbúgvin, sigur Heiðrikur á Heygum, ið kortini er væl nøgdur við gomlu fløguna.
Aftrat sær hevur Heiðrikur millum annað Una Árting og Heðin Ziska Davidsen, og verður framførslan í kvøld at kalla størri enn vanligt.
-Vit hava gjørt nógv burturúr konsertini í kvøld, og verður hon vónandi meira nærverandi og intim, enn konsertirnar á teimum ymsu festivalunum hevur verið, sigur Heiðrikur á Heygum.
