Tá ið HB higartil í ár hevur verið viðgjørt, so hevur fokus fyri tað mesta verið á, at leikliga avrikið ikki hevur verið eyðkent av tí, sum plagdi at verða tosað um sum HB snitt.
Tá ið tað ræður um úrtøku, so hevur tað higartil í ár roynst væl hjá HB, sum í kvøld fór av vøllinum í Hólmanum á Eiði við 3-0 sigri. Sigurin ber við sær, at HB eftir fýra umfør hevur fulla úrtøku, og at HB er næstovast á støðutalvuni.
Í fjør var Dan í Soylu marginalspælari í Klaksvík. Í vetur flutti hann aftur í Gundadal og til HB, og tað er sjón fyri søgn, at hann av álvara aftur hevur funnið stevið.
Í kvøld legði framrættaði miðvallarin upp til 1-0 málið, sum Emil G. Pedersen skoraði í fjórða minutti, og tað var Dan í Soylu, sum miðskeiðis í fyrra hálvleiki umsetti brotsspark til 2-0. Hetta var fyrsta málið í ár hjá Dan í Soylu, sum inntil í kvøld hevði verið á vøllinum allar dystirnar á tamb. Í kvøld varð hann skiftur út, tá ið tað restaðu 20 minuttir, og HB var frammanfyri 3-0. Ivaleyst var tað fyri at spara hann, so hann verður tøkur, tá ið HB mánakvøldið fær vitjan av KÍ í steypakappingini.
3-0 málið skoraði Jákup L. Thomsen eftir horna, tá ið seinni hálvleikur var eitt lítið korter gamal.
Hetta var fjórða málið hjá Jákupi L. Thomsen í ár. Hann er toppskjútti hjá HB og varð skiftur út, tá ið ein tímj var farin.
Merkisvert var tað, at nýggjur maður í kvøld var millum HB stólparnar. Bjarti Vitalis Mørk, sum undan kappingarbyrjan skifti úr B36 og til grannarnar er komin fyri seg eftir skaða, og í kvøld var tað hann, sum vardi málið, meðan Reinis Reinholds sat á beinkinum.
Eftir at EB/Streymur hevur tapt á útivølli ímóti KÍ og á heimavølli ímóti HB verður næsti landskappingardysturin annan sunnudag á heimavølli ímóti B68. Lutakastið í steypakappingini lagaði seg soleiðis, at EB/Streymur ikki fer at spæla í fyrsta umfari. 21. apríl fer EB/Streymur í fjórðingsfinaluni at spæla á heimavølli ímóti vinnaranum av dystinum millum AB og FC Suðuroy, sum verður mánakvøldið.
