Fótbóltur
Týskvøldið eftir at blaðið fór til prentingar, skuldu HB og NSÍ spæla útsetta dystin í fyrstu deild.
Sum kunnugt hevur ikki sørt av stríði staðist av hesum dystinum. Runavíkingar hava verið í øðini um, at FSF hevur flutt dystin, uttan so mikið sum at spyrja teir eftir, og bæði í leygardags- og týsdagsblað okkara hava ávíkavist venjarin og formaðurin í NSÍ givið sína misnøgd til kennar.
Nokta endurgjald
Runavíkingar eru tó ikki teir einastu, sum eru vorðnir firtnir í hesum málinum.
Eisini í HB er misnøgdin stór. Hetta tí FSF hevur álagt havnarfelagnum at rinda NSÍ 10.000 krónur í endurgjaldi fyri flytingina. Hetta til at rinda tær útreiðslur, sum runavíkingarnir hava av flytingini.
Orsøkin til misnøgdina hjá HB er tann, at teir alla tíðina hava hildið fast um, at eitt møguligt endurgjald als ikki fór at koma upp á tal.
Steinfinnur Mittelstein, sum er stjóri í P/F Havnar Fótbóltur, sigur við Sosialin, at flytingin fyrst og fremst komst av, at eitt mistak varð framt, tá ferðin til Eysturríkis varð bíløgd. Sambært skránni fyri ferðina, skuldi hópruin hjá HB verið aftur í Føroyumj fríggadgain, men á ferðini varnaðust teir, at ferðin úr Danmark til Eysturríki tók nógv longri, enn ásett var.
Steinfinnur Mittelstein sigur, at teir tá settu seg í samband við NSÍ, og tá teir noktaðu at flyta dystin, settu teir seg í samband við FSF.
- Vit tosaðu við kappingarstjóran, og hann skilti væl trupulleikan, sum vit nú høvdu rent okkum í. Meðan vit soleiðis tosaðu saman um, hvørjir møguleikar vóru at flyta dystin, nevndi hann møguleikan fyri einum endurgjaldi, men tað søgdu vit korta nei til, og so varð ikki tosað meira um tað.
- Hóskvøldið fingu vit so boð um, at ynski um flyting var gingið okkum á møti. Tey boðini vóru tó givin um telefonina, og av formligum ávum bóðu vit so eisini um, at boðini vórðu givin okkum við faksi.
- Tað var sum so eingin trupulleiki. Faksið varð eisini sent okkum, men tá vit leygardagin lesa hetta, síggja vit, at HB verður álagt at rinda NSÍ 10.000 krónur. Hetta høvdu teir einki nevnt um í telefonsamrøðuni við okkum, og teir vistu eisini framman undan, hvørji boðini frá okkum vóru um hetta. Vit gjørdu greitt, at hetta kom ikki upp á tal, og tað ger tað framvegis ikki, sigur Steinfinnur Mittelstein, sum vegna Havnar Fótbóltur í gjár sendi skriv til FSF, har teir gera vart við hetta.
Vandamikil leið
Tað eru fleiri lutir, sum gera, at stjórin í havnarfelagnum er somikið misnøgdur um hetta.
- Fyri tað fyrsta, so hevur FSF valt, at føroyskur fótbóltur skal taka lut í altjóða kappingum, og hetta hevur so eisini gjørt, at føroysku feløgini koma út í Europa.
- Hesir dystir verða aloftast spældir mitt í viku, og gjarna hóskvøld, og tí er tað onkun tíð neyðugt, at dystir mugu flytast. Tað kann so ikki metast órímiligt, at leikararnir sleppa at vera heima í í øllum førum 24 tímar, áðrenn dystur skal leikast. Vit høvdu upprunaliga ætlað at spæla sunnudagin, men tá vit varnaðust, at heimferðin varð seinkað, gjørdu vit alt fyri eitt vart við hetta.
- Harafturat haldi eg, at tað er sera vandamikið, um FSF nú fer at áseta bøtur ella endurgjald, um dystir skulu flytast. Í hesum førum hava teir valt 10.000 kr., men nær skal talan verða um 5.000 ella 15.000. Hjá onkrum felag er talan um fleiri skúlanæmingar, og skal endurgjaldið tá verða minn, ella skulu feløgini til at dokumentera mista inntøku hjá spælarunum?
- Hetta kann eisini viðføra, at øll feløg framyvir seta seg ímóti at flyta dystir, um fyrispurningur kemur um hetta. So verður málið latið FSF, og so kann felagið fáa endurgjald. Tá fer tað at snúgva seg um, hvussu nógv felagið kann vinna fíggjarliga við eini flyting, heldur enn at ítróttarligu sjónarmiðini verða nýtt.
Mugu hava greiðar reglur
At enda sigur Steinfinnur Mittelstein, at hann als ikki er ósamdur við NSÍ-formanninum, tá hesin í blaðnum í gjár ger vart við, at føroyskum fótbólti tørvar greiðar reglur um, hvussu skal farast fram í slíkum málum.
- Tað vildi ikki verið annað enn náttúrligt, at fastar mannagongdir vórðu skipaðar hesum viðvíkjandi. Sum nú er, verður støða tikin, tá trupulleikin kemur, og tað átti ikki at verið neyðugt.
- Tað kundi til dømis eitt krav, at leikarar sluppu at vera heima í 24 tímar undan dysti, ella eisini kundi atlit verði tikið til hetta, tá skráin fyri kappingarárið verður løgd.
- Tá skráin verður løgd, vita vit longu, hvørji feløg taka lut í europeisku kappingunum, og vit vita eisini, nær UEFA hevur ásett leikdagarnar. Tí átti tað ikki at verið ógjørligt, at lagt upp fyri slíkum flytingum, tí tað ber ikki til, at tað á hvørjum ári skal gerast ein trupulleiki, tá vit eru komin í august mánað.
- Hvat fer til dømis at henda, tann dagin eitt føroyskt lið spælir seg fram til næsta umfar? Tá eru vit komin til endan á kappingarárinum, og tí verður trupulleikin tá uppaftur størri, um vit ikki hava greiðar mannagongdir at ganga eftir, sigur Steinfinnur at enda.
