- Eg var skrivari hjá Norðuratlantsbólkinum sum eitt hjástarv, og eg havi ongantíð verið politiskt aktiv, sigur Liljan Weihe, tíðindaleiðari hjá Kringvarpinum.
Hon vísir á, at tað var ikki bara Høgni Hoydal, ið var limur í Norðuratlantsbólkinum.
- Skuldi eg verið sett í bás politiskt, kundi tað eins væl verið í Fólkaflokkinum, tí eg var skrivari hjá Bjarna Djurholm, fyrrverandi landsstýrismanni, og eg havi eisini verið skrivari hjá Jóannes Eidesgaard, sigur Liljan Weihe.
Hon vísir á, at Kaj Leo Holm Johannesen er landsins leiðari, og tað er hennara starv at halda eitt kritiskt eyga við tí, hann ger.
- Eg respekteri hansara starv, sjálvt um eg skal hyggja kritiskt upp á tað, hann ger. Og eg haldi, at hann eisini má respektera mítt starv, sigur Liljan Weihe.
Hon heldur, at við at nevna hennara navn, verður hon koyrd í fremstu røð.
- Men tað er jú starvið hjá øllum journalistum at hava eitt vakið eyga við løgmanni, og tað hava tit í Miðlahúsinum eisini havt, sigur Liljan Weihe, tíðindaleiðari í Kringvarpinum.
