Dumpingákæran
Síðst í november vóru umboð fyri Havbúnaðarfelagið á fundi við nevndina hjá ES, sum viðger dumpingmálið móti føroyskum laksaalarum. Á hesum fundi løgdu føroysku umboðini saman við sakførara sínum í Brúsell fram sína verju í málinum.
Gongdin
Tað var 18. juli í ár, at ES kunngjørdi, at dumpingákæra var reist móti Føroyum og Chile.
- Virkini, sum vóru útvald til nærri kanning, lótu tilfar sítt inn fyrst í oktober, og ein mánað seinni vóru 2 umboð frá Trade Defence, ið er tann deildin í DG Trade, sum viðger málið, í Føroyum og grannskoðaðu tær frágreiðingar, sum virkini høvdu latið frá sær.
Vinnuhúsið sigur, at Havbúnaðarfelagið í oktober læt eina skrivliga frágreiðing til ES, har felagið lýsti síni sjónarmið viðvíkjandi ákærunum um, at føroyingar hava dumpað og harvið volt laksaframleiðarum í ES skaða.
Á fundi við ES
- Seinasta, sum so hent er í málinum er, at umboð fyri Havbúnaðarfelagið síðst í november vóru á fundi við nevndina, sum viðger dumpingmálið, og har vóru høvuðstættirnir í verjuritinum framlagdir.
Endamálið við fundinum var at tryggja sær, at nevndin, sum viðger dumpingmálið, hevur skilt tey sjónarmið, sum Havbúnaðarfelagið ynskir at føra fram.
- Nakað inn í komandi ár verður væntandi greitt, hvar málið um dumping av laksi endar, sigur Vinnuhúsið.
