Tinglimir Sambandsfloksins reika landið runt at fáa fólk at velja Sambandsflokkin á Fólkating og hava ikki stundir at tosa um málið um Jenis av Rana, segði løgmaður við sjónvarpið í kvøld. Men tey fara í øllum førum at tosa um politikk leygarmorgunin, tí tá hevur Sambandsflokkurin árliga heystfundin, har tey tosa um dagsins politisku mál.
Í Degi og viku í kvøld vildi løgmaður ikki svara spurninginum, um hann fer at koyra Jenis av Rana frá sum landsstýrismann, áðrenn málið verður reist í Løgtinginum. Hann vildi heldur ikki svara uppá, hvat hann fer at mæla tingfólkum floksins til at atkvøða, tá misálitið verður reist í Løgtinginum.
Greitt er, at flokkurin stendur ikki saman í hesum máli, tí Johan Dahl hevur boðað frá, at hann fer at atkvøða fyri einum misáliti á Jenis av Rana.
Løgmaður endurtók annars í sjónvarpinum í kvøld, at hann tekur fulla frástøðu frá orðunum hjá Jenis av Rana um formannin í Konservativa flokkinum í Danmark, Søren Pape Poulsen.
– Eg havi sagt honum, at at hatta er langt frá tí menniskjafatan, sum eg og Sambandsflokkurin standa fyri, og at hatta ikki er greiða fatanin hjá føroyingum, segði løgmaður í Degi og viku í kvøld.
Heystfundurin hjá Sambandsflokkinum verður á Hotel Hilton leygardagin 29. oktober frá klokkan 8 til 13 við hesi dagsskrá:
Kl. 08.30 Morgunmatur og drekka
Kl. 09.00 Formaðurin bjóðar vælkomið og setir fundin
Kl. 09.05 Frágreiðing um valstríðið hjá flokkinum higartil, politisku støðuna í samfelagnum o.a.
- Formaðurin greiðir frá, saman við landsstýrisfólkunum
Kl. 09.30 Politiskt orðaskifti
- Fundarluttakararnir hava orðið - viðmerkingar og spurningar
Kl. 10.30 Steðgur
Kl. 10.45 Framhald av politiskum orðaskifti - viðmerkingar og spurningar
Kl. 12.00 Fundurin lokin
------
Kl. 12.00-13.00 Sambandsflokkurin bjóðar til frokost
Sambandsflokkurin ger á heimasíðu floksins, at fundurin ikki er almennur:
– Heystfundur verður hildin á hvørjum ári og er ikki almennur. Talan er um ein fund fyri limir og sambandsáhugað í Landsfelag Sambandsfloksins um støðuna í flokkinum, politisku støðuna í samfelagnum o.a., skrivar Sambandsflokkurin á heimasíðuni.
