Tað er ikki gravgangur eftir at verða læknafakligur varastjóri í sjúkrahúsverkinum. Tað má ásannast, nú freistin at søkja starvið sum varastjóri við læknafakligari útbúgving, fór á midnátt.
Turid Arge, aðalstjóri í heilsumálaráðnum sigur at tilsamanas hava tey fingið fimm umsóknir til starvið.
Hetta er aðru ferð, starvið verður lýst leyst. Fyrru ferðina var bara ein umsøkjari og tískil varð avgjørt at lýsa starvið leyst av nýggjum. Og tað loysti seg, tí tá ið umsóknarfreistin fór á midnátt, høvdu tey fingið fýra umsøkjarar afturat, soleiðis at tað nú eru fimm umsøkjarar at velja ímillum.
Turid Arge sigur, at umsøkjarar eru bæði úr Føroyum og uttanlands, men teir hava eitt til felags og tað er, at teir eru allir menn. Hon sigur, at nú verður starvið ikki lýst leyst aftur, í hvussu so er ikki fyribils, men at tey fara at royna at seta starvið við einum av umsøkjarunum.
Nú skal ein setanarnevnd setsast, og so verður farið undir at viðgera umsóknirnar. Hon veit ikki, hvussu langa tíð, tað fer at taka, men hon sigur, at tey fara at brúka ta tíð, sum er neyðugt fyri at fáa rætta mannin í starvið.
– Hetta er eitt nýtt starv. Áður hevur verið talan um ein varastjóra fyri Landssjúkrahúsið burtur av, men varastjórin, sum nú skal setast, verður fyri øll tey trý sjúkrahúsini.
Varastjórin við læknafakligari bakgrund er ovasti ábyrgdarhavandi lækni í føroyska sjúkrahúsverkinum, og mannar, saman við sjúkrahússtjórunum og hinum varastjórunum leiðsluna í sjúkrahúsverkinum og ein uppgáva verður at seta gongd á samstarvið ímillum tey trý sjúkrahúsini.
