Høgni Lisberg hevur við lagnum Learn To Ride On Waves bitið seg fastan á ovasta plássið á 15 teimum bestu. Lagið brúkti nógvar vikur til veruliga at koma undir húðina á føroyingum, men í seinastu viku aftan á 10 vikur á listanum legði lagið seg ovast á lisan. Aftur hesa vikuna heldur lagið avbjóðarar sum James Blunt og Kelly Clarkson aftan fyri seg.
Í seinastu viku gjørdist tað greitt, at eisini fólk í Belgiu vóru farin at taka tónleikin hjá Høgna til sín. Løgini Morning Dew og Just Dig eru at hoyra hvønn dag á stóru belgisku útvarpsrásini Radio 1, og fløgan Morning Dew verður nú send út í Benelux av stóra útbreiðslufelagnum Rough Trade.
Annars er ikki nógv føroyskt á 15 teimum bestu hesa vikuna. Lagið Droymi mitt um dagin hjá Poppkorn er dottið niður á 12. pláss, og Thor Simonsen, ið hevði eykalag í seinastu viku gjørdist ov stuttur.
Aftur hesa vikuna er eitt føroyskt eykalag, talan er um lagið Fremmandur av fløguni hjá Peturi Pólsyni. Lagið Timburmenn hjá Peturi datt í seinastu viku av listanum eftir nógvar vikur millum best dámdu føroysku løgini.
