Stríðið í Ukraina er framvegis ein blettur á felags samvitskuna.
Tað sigur ST-aðalskrivarin, Antonio Guterres, í eini fráboðan, sum sambært tíðindastovuni Reuters varð lisin upp á fundi í ST-trygdarráðnum týsdagin.
Fundurin er hildin fýra ára dagin fyri, at Russland hersetti Ukraina.
– Vit hava verið vitni til eina rúgvu av avleiðingum orsakað av hesum beinleiðis brotinum á altjóðarættin, sigur Guterres um russisku innrásina.
Aðalskrivarin rósar eisini átøkunum hjá USA og fleiri øðrum londum at fáa enda á krígnum.
Men neyðugt er við ítøkiligum tiltøkum, um ósemjan skal av-eskalerast, soleiðis at pláss kann skapast fyri diplomati, legði hann afturat.
Sambært ST eru fleiri enn 15.000 sivil fólk dripin í Ukraina seinastu fýra árini, meðan fleiri enn 41.000 hava fingið skaða. Millum tey deyðu og særdu eru 3.200 børn.
– Nóg mikið við deyðanum. Nokk við oyðileggingini. Nóg mikið við oyðilagdu lívunum og sundurbrotnu framtíðini, sigur Guterres og endurtekur áheitan um vápnahvíld beinanvegin.
/Ritzau/
