Gunnar Nielsen vardi málið hjá íslendska meistaraliðnum, FH tá hafnfirðingar á heimavølli á Kaplakrika leikvøllinum á Hafnarfjørðinum tóku ímóti oddaliðnum, Stjarnuni, sum undan dystinum var heili sjey stig frammanfyri FH.
Tann munurin er so minkaður niður til fýra stig nú, tí FH vann ein tryggan 3-0 sigur á Stjarnuni. Í FH meta teir, at teir spældu sín besta dyst í hesum kappingarárinum í kvøld.
Sambært dystarfrásøgnini hjá íslendska Morgunblaðnum hevði Gunnar Nielsen tvær framúr góðar bjargingar, og gjørdi sostatt sítt til, at lið hansara fekk ein góðan heimasigur.
Steve Lennon legði FH á odda tá fyrri hálvleikur var hálvrunnin. Tá 18 minuttir vóru leiktir av seinna hálvleiki økti Kristján Flóki Finnbogason til 2-0. Þórarinn Ingi Valdimarsson staðfesti sigurin tá níggju minuttir vóru eftir av vanligu leiktíðini.
Talan er um ein sera týdningarmiklan sigur fyri FH, sum nú aftur hevur samband við oddaliðini í pepsideildini.
Komandi dystur hjá FH verður mikukvøldið 14. juni, tá teir spæla á útivølli ímóti Grindavík.
Støðan í pepsideildini:
| 1 | Stjarnan | 6 | 4 | 1 | 1 | 15:8 | 13 |
| 2 | Valur | 6 | 4 | 1 | 1 | 11:6 | 13 |
| 3 | Grindavík | 5 | 3 | 1 | 1 | 9:8 | 10 |
| 4 | FH | 6 | 2 | 3 | 1 | 13:9 | 9 |
| 5 | KA | 5 | 2 | 2 | 1 | 10:7 | 8 |
| 6 | KR | 5 | 2 | 1 | 2 | 8:8 | 7 |
| 7 | Fjölnir | 5 | 2 | 1 | 2 | 4:6 | 7 |
| 8 | ÍBV | 6 | 2 | 1 | 3 | 6:11 | 7 |
| 9 | Breiðablik | 5 | 2 | 0 | 3 | 7:10 | 6 |
| 10 | Víkingur Reykjavík | 5 | 1 | 1 | 3 | 7:9 | 4 |
| 11 | Akranes | 5 | 1 | 0 | 4 | 11:14 | 3 |
| 12 | Víkingur Ólafsvík | 5 | 1 | 0 | 4 | 5:10 | 3 |
