Føroyski landsliðsmálverjin, Gunnar Nielsen og lið hansara, Motherwell hava eina góða gongd í skotsku Premier League, har liðið við tveimum sigrum seinastu tvey umførini hevur vart annað plássið í bestu skotsku fótbóltsdeildini.
Fyrr í vikuni vann Motherwell 1-0 á Inverness, har Gunnar Nielsen, sambært høvuðsvenjaranum, Stuart McCall stóð sín besta dyst fyri Motherwell higartil. Ígjár gekk aftur væl hjá Motherwell, sum á heimavølli vann 2-1 á Ross County.
Aberdeen og Motherwell togast um 2. plássið. Bæði hava 57 stig, meðan heili 24 stig eru upp til Celtic, sum liggur á odda við heili 81 stigum.
Gunnar Nielsen fegnast um gongdina, og álitið hann hevur fingið frá venjaranum, Stuart McCall. Føroyski landsliðsmálverjin og liðfelagarnir hava eina margin uppá sjey stig niður til Dundee United, sum liggur á fjórða plássi. Sera týdningarmikið er hjá Motherwell at gerast minst nummar trý í kappingini, tí hetta gevur atgongd til Europa League.
Við at TRÝSTA á PÍLIN undir MYNDINI ber til at hoyra eina samrøðu við Gunnar Nielsen, sum var tikin upp ígjár. Tíverri er ljóðgóðskan ikki meir enn næstbest.
